“ТТӨ-ий өвчлөлийн толерант хязгаарын шинэчилсэн бодолт” сургалт болов

2012 оны 5 дугаар сарын 17-19-ны өдөр Томуугийн нэгдүгээр зэрэглэлийн харуулдан тандалтын аймгуудын мэргэжилтнүүдийг хамарсан “ТТӨ-ий өвчлөлийн толерант хязгаарын шинэчилсэн бодолт”-ыг нэвтрүүлэх халдвар судлагч, статистикч нарын сургалт амжилттай болж өндөрлөв. Сургалтанд Дархан-Уул аймгийн халдвар судлагч Б.Эрдэнэцэцэг, Дорноговь аймгийн ХӨТСА-ны дарга Б.Баясаа, халдвар судлагч Н.Өлзийжаргал, Дорнод аймгийн мэргэжилтэн Д.Гэрэлтуяа, халдварт өвчин хариуцсан статистикч бага эмч З.Сарантуяа, Өвөрхангай аймгийн халдвар судлагч М.Золзаяа, НЭМХ-ийн дарга Б.Наранцэцэг, Сэлэнгэ аймгийн дархлаажуулалт, халдварт өвчний тандалт хариуцсан мэргэжилтэн П.Сэлэнгэ, дархлаажуулалтын хүйтэн хэлхээ хариуцсан бага эмч Ж.Мөнхболор, Ховд аймгийн халдвар судлагч С.Бат-Өлзий, Ховд аймгийн статистикч Д.Одонтуяа оролцов.

Эхний өдөр академич П.Нямдаваа уг семинарын ач холбогдол, семинарт оролцогсдын үүргийг тодорхой тайлбарлаж сургалтыг нээлээ. Мөн өдөр ХӨСҮТ-ийн Халдварт өвчний эрт сэрэмжлүүлэх хариу арга хэмжээ авах нэгжийн дарга А.Бурмаа “Халдварт өвчний тандалтанд толерант хязгаар тодорхойлж, хэрэглэх ач холбогдлын тухай”, төслийн веб/мастер, дата/менежер Б.Ганцоож “Толерант хязгаар олох Серфлингийн арга”, “Толерант хязгаар олоход ашиглах MS Excel программын зарим хэрэгцээт функцууд” сэдэвт хичээл зааж, хоёр дахь өдөр төслийн веб/мастер, дата/менежер Б.Ганцоож “Улсын хэмжээний ТТӨ-ий толерант хязгаарыг Серфлингийн аргаар олох”, “Улаанбаатар хот, аймгуудийн ТТӨ-ний толерант хязгаарыг Серфлингийн аргаар олох” дадлагын хичээл удирдан явуулж, өөрсдийн аямгийн ТТӨ-ний толерант хязгаарыг 2 хувилбараар тооцоолов. Гурав дахь өдөр төслийн захирал, академич П.Нямдаваа “Судалгааны илтгэл, өгүүлэл бичих тухай” лекц уншиж, Б.Ганцоож “MS Excel програм дээр график байгуулах”, А.Бурмаа “Өгүүлэл бичих дадлага”-ын хичээл удирдан явууллаа. Сургалтын онол ба дадлагын хичээлийн үр дүнд сургалтанд хамрагдсан ТХТН-ийн нэгдүээр зэрэглэлийн нэгжүүд болох Ховд, Өвөрхангай, Дорнод, Дорноговь, Сэлэнгэ аймгууд өөрийн аймгийн томуугийн 2006-2011 оны өвчлөлд дүн шинжилгээ хийж, ТТӨ-ний толерант хязгаарыг Серфлингийн аргаар тодорхойлж, MS Excel программ дээр ажиллаж сурлаа (Хичээлүүдийг манай вэб-сайтын “Судалгаа, шинжилгээ ” булангаас үзэж болно).

Судалгааны дүнг эрдэм шинжилгээний өгүүллэг бичих аргачлалын дагуу боловсруулж, 2012 оны 9 дүгээр сард болох “ТХТН-үүдийн 2 дугаар сургалт-семинар”-ийг угтан хэвлүүлэх “Халдварт өвчин судлалын Монголын сэтгүүл”ийн №5-д нийтлүүлэх, томуугийн ирэх улирлаас энэ 5 аймгийн толерант хязгаар дээр 7 хоног бүрийн өвчлөлийг нь тусган flu.mn вэб-сайтад тавьж байхаар тохиролцлоо.

Харамсалтай нь Орхон аймаг сургалтанд оролцох төлөөлөгчдөө ирүүлээгүй, Дархан-уул аймгийн ганц оролцогч нь өвчлөлиийн мэдээгээ авчраагүй тул Дархан-уул, Орхон аймгуудын ТТӨ-ний толерант хязгаар бодогдож чадсангүй.